Jab ham Eid ki namaz padhne jate hain to Imam sahab hame namaz ka tareeqa sikhate hain. Kyun ke ye namaz saal me sirf do martaba aati hai, is liye bahut se log takbeeraat me bhool kar dete hain.
Jab niyyat sikhayi jati hai to kaha jata hai:
“2 rakat namaz Eid ul Fitr ki” ya “2 rakat namaz Eid ul Ad’ha ki”
Lekin kabhi ye nahi suna hoga ke: “2 rakat namaz Bakri Eid ki.”
Sochne wali baat ye hai ke Hind o Pak aur chand aas-paas ke mumalik ko chhod kar, Arab countries ho, Western countries ho ya Eastern countries har jagah is Eid ko “Eid ul Ad’ha” hi kaha jata hai. Yani Qurbani ki Eid.
Aur Eid me sirf bakre hi nahi, balke aur dusre janwaron ki bhi qurbani hoti hai. Phir Eid ko sirf “Bakri” se hi kyun mansub kar diya gaya?
Haqeeqat ye hai ke is Eid ka naam “Bakri Eid” hai hi nahi. Bas ye lafz aam bol chaal me chal pada, aur dheere dheere itna mashhoor ho gaya ke ham ne bhi bina soche samjhe use qabool kar liya.
Aaj ham khud bhi “Bakra Eid” bolte hain, hamare bachche bhi wahi seekh rahe hain, aur aane wali naslein bhi isi ko asal naam samajh rahi hain.
Jab tak ham khud apni zubaan aur apni istilah ko nahi badlenge, tab tak dusron se kya umeed rakhen?
Gair Muslim log bhi “Bakri Eid” kehna tab chhodenge jab ham khud:
Eid ul Ad’ha likhenge, bolenge, aur aam karenge.
Chahe:
Mazhabi kitaabein ho,
Risaale ho,
Calendar ho,
Pamphlets ho,
Posters ho,
Social media posts ho,
ya roz marrah ki guftagu…
Har jagah hame “Eid ul Ad’ha” ko aam karna hoga.
Aaj se ye ahad karte hain ke ham koshish karenge ke is mubarak Eid ko uska asal aur shar‘i naam wapas dilayen.
